'ആദ്യ കുഞ്ഞിന്റെ ആത്മജ എന്ന പേരിനേക്കാൾ മുകളിൽ പോയല്ലോ ഇത്'; മകൾക്ക് പേരിട്ട് ദേവികയും വിജയ്‍യും

കുഞ്ഞിന്റെ ജനനത്തെക്കുറിച്ച് അറിഞ്ഞതിനുശേഷം വിളിക്കുന്നവർ എല്ലാം കുഞ്ഞ് ആണോ പെണ്ണോ എന്ന് ചോദിക്കാറില്ലെന്നും എല്ലാവർക്കും അറിയേണ്ടത് കുഞ്ഞിന്റെ പേരാണ് എന്നും ദേവികയും വിജയ്‍യും പറഞ്ഞു. അതുകൊണ്ടാണ് കുഞ്ഞിന് ഇരുപത്തിയെട്ട് ദിവസം തികയുന്നതുവരെ കാത്തിരിക്കാതെ ഇപ്പോൾ പേര് വെളിപ്പെടുത്തിയിരിക്കുന്നത് എന്നാണ് വിജയ് ഒരു പുതിയ വീഡിയോയിൽ പറഞ്ഞത്.

ദേവികയും വിജയ്‍യും മൂത്ത കുട്ടിക്ക് ആത്മജ മഹാദേവ് എന്നാണ് പേര് നൽകിയിരിക്കുന്നത്. അതിന്റെ പേരിൽ ഇരുവർക്കും ധാരാളം വിമർശനങ്ങൾ നേരിടേണ്ടി വന്നു. "ചില പ്രശ്നങ്ങൾ കാരണം, ഡിസ്ചാർജിന്റെ തലേദിവസം ജനന സർട്ടിഫിക്കറ്റ് എഴുതാൻ കുഞ്ഞിന്റെ പേര് പറഞ്ഞു കൊടുത്തിരുന്നു. ദേവികയ്ക്ക് ശബ്ദത്തിൽ കുറച്ച് ബുദ്ധിമുട്ടുണ്ട്.

കുറച്ചുനാളായി വോയ്‌സ് റെസ്റ്റിലാണ്. അതുകൊണ്ടാണ് വീഡിയോയിൽ അധികം സംസാരിക്കാത്തത്. പ്രസവത്തെക്കുറിച്ച് അറിഞ്ഞതിനുശേഷം, എന്റെ പരിചയക്കാരും സുഹൃത്തുക്കളും കുടുംബാംഗങ്ങളും എന്തിനേറെ എന്റെ സ്വന്തം സഹോദരി പോലും കുട്ടി ആണോ പെണ്ണോ എന്ന് എന്നോട് ചോദിച്ചില്ല. എന്താണ് പേര് നൽകിയത് എന്നാണ് ചോദിച്ചത്. ആശുപത്രിയിൽ പോലും എല്ലാവരും ചോദിച്ചു.

പ്രസവത്തിന് മുൻപ് ഞാൻ പരിശോധനയ്ക്ക് വന്ന സമയം മുതൽ, കുട്ടിക്ക് എന്ത് പേരിടുമെന്ന് എന്നോട് ചോദിച്ചിരുന്നു. കുട്ടിയുടെ പേര് അറിയാൻ ആളുകൾ ഇത്രയധികം ആഗ്രഹിക്കുന്നുണ്ടെന്ന് അപ്പോഴാണ് എനിക്ക് മനസ്സിലായത്. ആദ്യത്തെ കുട്ടിക്ക് പേരിട്ടപ്പോഴുള്ള ബഹളം മൂലമാണ് ഇപ്പോഴത്തെ കൗതുകം എന്ന് എനിക്കറിയാം.പേരുകൾ ഒന്നും ഞാൻ കഷ്ടപ്പെട്ട് കണ്ടുപിടിച്ചതല്ല. എന്റെ ദർശനത്തിൽ വന്നതാണ്.

എന്റെ ചിന്തകളിൽ ദൈവം പ്രവർത്തിക്കുന്നുവെന്ന് ഞാൻ വിശ്വസിക്കുന്നു. കുട്ടി ആണോ പെണ്ണോ എന്ന് എനിക്ക് മുൻപ് അറിയില്ലായിരുന്നു. ഇത്തവണയും എന്റെ മനസ്സിൽ വന്ന പേര് ഞാൻ നൽകുന്നു. ദേവികയോട് ഞാൻ നേരത്തെ പേര് പറഞ്ഞിരുന്നു. അത് കേട്ടപ്പോൾ ദേവിക അത് ആത്മജയ്ക്ക് മുകളിൽ പോകുമല്ലോ എന്നാണ് പറഞ്ഞത്" എന്നാണ് വിജയ് മാധവ് പറഞ്ഞത്.