കണ്ണൂര്‍ എഡിഎം ആയി ചുമതലയേറ്റ് കല ഭാസ്‌കര്‍, സര്‍ക്കാരിന് ആശ്വാസം

കണ്ണൂര്‍: എഡിഎം ആയി തിരുവനന്തപുരം സ്വദേശിനി കല ഭാസ്‌കര്‍ ചുമതലയേറ്റു. മുന്‍ എഡിഎം നവീന്‍ ബാബുവിന്റെ ആത്മഹത്യയ്ക്ക് ശേഷം ഈ പദവിയിലേക്ക് വരാന്‍ ഉദ്യോഗസ്ഥര്‍ മടിച്ചിരുന്നു. ഇപ്പോള്‍ കല ഭാസ്‌കര്‍ ചുമതലയേറ്റതോടെ സര്‍ക്കാരിന് മുന്‍പിലുണ്ടായിരുന്ന ആ പ്രതിസന്ധിക്ക് പരിഹാരമാവുകയാണ്.

നവീന്‍ ബാബുവിന്റെ മരണശേഷം, ഈ പദവി കുറച്ചുനാള്‍ ഒഴിഞ്ഞുകിടന്നിരുന്നു. തുടര്‍ന്ന് പ്രേമചന്ദ്രക്കുറുപ്പ് എഡിഎം ആയി ചുമതല ഏറ്റെടുത്തു. അദ്ദേഹത്തെ എഡിഎം ചുമതലയില്‍ കൊണ്ടുവന്നത് സമ്മര്‍ദം ചെലുത്തിയാണെന്ന് ഒരു വിഭാഗം ഉദ്യോഗസ്ഥര്‍ ആരോപിച്ചിരുന്നു. മെയ് 31-ന് പ്രേമചന്ദ്രക്കുറുപ്പ് വിരമിച്ചതോടെ, എഡിഎം പദവിയില്‍ ആളില്ലാതായി.

ഇതോടെ ഫയലുകള്‍ കെട്ടിക്കിടന്നു. ഇതിനിടെ കണ്ണൂര്‍ എഡിഎം കസേരയിലേക്ക് സ്ഥാനക്കയറ്റം ലഭിച്ചവര്‍ രാഷ്ട്രീയ സ്വാധീനങ്ങള്‍ ഉപയോഗിച്ച് സമ്മര്‍ദം ചെലുത്തി ഒഴിഞ്ഞുമാറുകയായിരുന്നു. കല ഭാസ്‌കര്‍, നേരത്തെ തളിപ്പറമ്പ് തഹസില്‍ദാരായി ജോലി ചെയ്തിട്ടുണ്ട്. തൃശൂരിലെ ഔദ്യോഗിക കൃത്യനിര്‍വഹണത്തില്‍ നിന്നാണ് കണ്ണൂരിലേക്ക് എത്തിയിരിക്കുന്നത്.

നേരത്തെ, വടകരയിലും കല ഭാസ്‌കര്‍ തഹസില്‍ദാരായി പ്രവര്‍ത്തിച്ചിട്ടുണ്ട്. കണ്ണൂര്‍ മുന്‍ ജില്ലാ പഞ്ചായത്ത് പ്രസിഡന്റ് പിപി ദിവ്യ, ക്ഷണിക്കാതെ യാത്രയപ്പ് ചടങ്ങിനെത്തി എഡിഎം കെ. നവീന്‍ ബാബുവിനെതിരെ അഴിമതി ആരോപണം ഉന്നയിച്ചിരുന്നു. ഈ സംഭവത്തിന് പിന്നാലെ ഇദ്ദേഹത്തെ കണ്ണൂരിലെ ക്വാര്‍ട്ടേഴ്‌സില്‍ തൂങ്ങിമരിച്ച നിലയില്‍ കണ്ടെത്തുകയായിരുന്നു.